صفائی ستھرائی ،شجر کاری ،تجاوزات اور سینی ٹیشن کے لیے مربوط اقدامات ہونگے:عبدالعلیم خان

پنجاب کے نئے بلدیاتی نظام پر مشاورت مکمل ،سینئر وزیر آج وزیر اعظم کوسفارشات پیش کریں گے 

"کلین اینڈ گرین پنجاب "کی مہم صوبے کے 9ڈویژنل ہیڈ کو آرٹرز پر ایک ہی دن شرو ع کرنے کا فیصلہ

صفائی ستھرائی ،شجر کاری ،تجاوزات اور سینی ٹیشن کے لیے مربوط اقدامات ہونگے:عبدالعلیم خان

لاہور۔14ستمبر :۔۔( ) پنجاب میں نئے بلدیاتی نظام کے سلسلے میں مشاورت حتمی مرحلے کے نزدیک پہنچ گئی ہے اور پنجاب کے سینئر وزیر عبدالعلیم خان اور وزیر قانون محمد بشارت راجہ نے محکمہ بلدیات و قانون کے مشترکہ اجلاس میں مجوزہ بلدیاتی بل کے خد و خال کا جائزہ لیا اور اس ضمن میں پنجاب حکومت کی طرف سے تیار کردہ سفارشات سینئر وزیر عبدالعلیم خان 15ستمبر(آج) ہفتے کے روز وزیر اعظم عمران خان کو پیش کریں گے جبکہ اُس سے پہلے دیگر صوبوں کے بلدیات کے وزراء سے اس معاملے پر باہم صلاح مشورہ کیا جائے گا۔ اس حوالے سے گفتگو کرتے ہوئے عبدالعلیم خان نے کہا کہ ماضی کے تجربات کو سامنے رکھتے ہوئے پنجاب میں بہتر سے بہتر بلدیاتی نظام لانے کی کوشش کریں گے جس میں انتظامی و مالیاتی اختیارات کے علاوہ چیک اینڈ بیلنس کو بھی یقینی بنایا گیا ہو ،انہوں نے کہا کہ صوبے کے نئے بلدیاتی سیٹ اپ میں کونسلر کو بھی ترقیاتی سکیمیں دینے کا اختیار حاصل ہو گا جس سے گراس روٹ لیول پر اختیارات کی تقسیم اور مسائل کی نشاندہی کا موقع ملے گا ۔

اس سلسلے میں منعقدہ اعلیٰ سطحی اجلاس میں سینئر وزیر عبدالعلیم خان نے بتایا کہ "کلین اینڈ گرین پنجاب"کی مہم کو صوبے بھر کے9ڈویژنل ہیڈ کو آرٹر پر ایک ہی دن شروع کرنے کا فیصلہ کیا گیا ہے ستمبر کے آخری ہفتے میں شرو ع ہونے والی اس 30روزہ مہم میں صفائی ستھرائی کے انتظامات ،شجر کاری ، تجاوزات کے خاتمے ، سینی ٹیشن کومربوط بنانے کیلئے ٹھوس بنیادوں پر کام ہوگا اور اراکین قومی و صوبائی اسمبلی ، ڈویژنل وضلعی انتظامیہ ،بلدیاتی اراکین او ر زندگی کے مختلف شعبوں سے تعلق رکھنے والے لوگوں کو اس مہم میں شامل کیا جائے گا ،انہوں نے سیکرٹری بلدیات کو ہدایت کی کہ وہ اپنے نیٹ ورک کے ذریعے اس ایک ماہ کی مہم کو زیادہ سے زیادہ موثر اور فائدہ مند بنانے کیلئے تمام ضروری اقدامات برؤئے کار لائیں اور اس سلسلے میں ضلعی انتظامیہ سے اجلاس منعقد کر کے "ہوم ورک " کے لئے عاشورہ کے فوراً بعد اپنی سرگرمیوں کا آغاز کر دیں ،سینئر وزیر نے اس سلسلے میں آگاہی مہم شروع کرنے کی بھی ہدایت کی تاکہ لوگوں کو اس بارے میں اعتماد میں لیا جا سکے ،عبدالعلیم خان نے کہا کہ "کلین اینڈ گرین پنجاب"کی مہم کا افتتاح وزیر اعلیٰ پنجاب کریں گے جبکہ مختلف ڈویژنل ہیڈ کو آرٹرز پر وفاقی و صوبائی وزراء بھی اس میں شریک ہوں گے ،انہوں نے کہا کہ ہر ضلعی ہیڈ کو آرٹر پر ایک لاکھ پودے لگائیں جائیں گے جن میں تعلیمی اداروں کے بچوں کو خصوصی طور پر شامل کیا جا ئے گا ،عبدالعلیم خان نے کہا کہ اس مہم کو سیاسی فائدے کیلئے نہیں بلکہ شہریوں کو بہتر ماحول اور شہری سہولتوں کی فراہمی کیلئے تشکیل دیا گیا ہے جسے مستقل بنیادوں پر جاری رکھا جائے گا۔ 

سیکرٹری بلدیات عارف انور بلوچ و دیگر افسران نے کلین اینڈ گرین پنجاب کی مہم پر اجلاس کو تفصیلی بریفنگ دیتے ہوئے اس کے خدو خال پر روشنی ڈالی ،ا نہوں نے بتایا کہ اس مہم میں تمام ضلعی محکموں کو شامل کیا جا رہا ہے جبکہ عام پبلک کی آگاہی کیلئے بھی مہم ڈیزائن کی گئی ہے ،انہوں نے بتایا کہ اس سلسلے میں افسران و اہلکاران کو ڈیوٹیاں تفویض کر دی گئی ہیں جن میں کسی قسم کی غفلت برداشت نہیں کی جائے گی ۔ 

بہ تسلیمات نظام اعلیٰ ہینڈ آؤٹ1775 /گوھر/احسن

تعلقات عامہ حکومت پنجاب لاہور ۔فون نمبر99201390 ہینڈ آؤٹ (اے)