زیر التو امنصوبے جلد مکمل کریں ،شہری ادارے موثر منصوبہ بندی یقینی بنائیں:عبدالعلیم خان

سینئر وزیر کی سرکاری محکموں کی کارکردگی بہتر اورباہمی رابطے کافقدان ختم کرنے کی ہدایت

زیر التو امنصوبے جلد مکمل کریں ،شہری ادارے موثر منصوبہ بندی یقینی بنائیں:عبدالعلیم خان 

سینئر وزیر پنجاب عبدالعلیم خان کی زیر صدارت مختلف محکموں کی کارکردگی کی بہتری کیلئے اجلاس

لاہور۔25جنوری:۔۔( )سینئر وزیر پنجاب عبدالعلیم خان نے ہدایت کی ہے کہ سرکاری محکموں کی کارکردگی روائتی انداز اختیار کرنے کی بجائے احسن انداز میں بہتر بنائی جائے ، بالخصوص مختلف محکموں کے مابین باہمی رابطے کے فقدان کو ختم کیا جائے تاکہ عوامی فلاح و بہبود کے منصوبوں کو تیزی سے پایہ تکمیل تک پہنچایا جا سکے ،سینئر وزیر نے90شاہرائے قائد اعظم پر بلدیات ، ایل ڈی اے ، واسا، ضلعی انتظامیہ ،پولیس ، سالڈ ویسٹ مینجمنٹ اور دیگر شہری اداروں کے اعلیٰ سطحی اجلاس کی صدارت کرتے ہوئے ہدایات دیں کہ اربوں روپے کے ایسے زیر التوامنصوبے جن پر بھاری رقوم خرچ ہو چکی ہیں کو فوری طور پر مکمل کیا جائے اور ہنگامی بنیادوں پر ایسی پالیسی طے کی جائے جس سے ان منصوبوں کو جلد از جلد عوام کے لئے فنکشنل بنایا جا سکے،عبدالعلیم خان نے کہا کہ شہری سہولتوں کی فراہمی کیلئے ذمہ داریوں کا بھی واضح تعین ہونا چاہیے اور کہیں بھی اوورلیپنگ نہیں ہونی چاہیے ،سینئر وزیر نے درپیش مسائل کے حل کیلئے مختلف محکموں پر مشتمل ورکنگ گروپس کے قیام کی منظوری دی جو کم سے کم وقت میں حل طلب امور پر حکمت عملی طے کرے گا ، عبدالعلیم خان نے ہدایت کی کہ پنجاب کے 22شہروں کے ماسٹر پلان اور دیگر شہری امور کیلئے عالمی معیار کے کنسلٹنٹ کی خدمات حاصل کی جائیں ،انہوں نے ایل ڈی اے ، ٹیپا ، واسا اور دیگر شہری اداروں کیلئے اہم ٹاسک کی منظوری دی ،انہوں نے کہاکہ تمام محکمے رواں مالی سال کیلئے واضح ایجنڈہ سامنے رکھیں اور ناکارہ یونٹس کو بند کیا جائے ،سینئر وزیر نے یہ ہدایت بھی کی کہ ماضی میں لاہور ائیر پورٹ سمیت مختلف تعمیراتی منصوبوں میں سامنے آنے والی خرابیوں کا واضح تعین کیا جائے اور اس امر کو یقینی بنایا جائے کہ آئندہ ان کا اعادہ نہ ہو ، عبدالعلیم خان نے لاہور سمیت پنجاب کے بڑے شہروں میں ٹریفک اور ٹرانسپورٹ کے مسائل کو دریرپا بنیادو ں پر حل کرنے کا بھی کہا ،انہوں نے کہا کہ ہمیں میٹرو اور اورنج لائن ٹرین کے مستقبل کے مسائل کا ابھی سے اندازہ لگانا ہوگا ،سینئر وزیر نے محکمہ بلدیات کو صوبے کے تمام شہروں میں خرچ نہ ہونے والے سرکاری فنڈز کے استعمال کو یقینی بنانے کی ہدایت کی ،اجلاس میں طے پایا کہ فروری کے مہینے میں تمام محکمے اپنی سفارشات تیار کر لیں گے جس کے بعد عملی کام کا آغاز کر دیا جائے گا ۔

سینئر وزیر کو اجلاس میں سیکرٹری بلدیات ، کمشنر و ڈپٹی کمشنر لاہور،ڈی آئی جی پولیس اور دیگر سینئر افسران نے بریفنگ دیتے ہوئے شہری مسائل اور مختلف منصوبوں میں پائی جانے والی خرابیوں کی نشاندہی کی اور یقین دلایا کہ اُن کی ہدایات کی روشنی میں بہتر سے بہتر میکنزم تشکیل دیا جائے گا اور ورکنگ گروپس اپنی کاروائی مکمل کر کے کم سے کم وقت میں رپورٹ پیش کریں گے ۔