پنجاب گندم کٹائی میں 22دن آگے ہے، فصل اچھی ہے،کسی بحران کا خدشہ نہیں:عبدالعلیم خان

گندم کی ترسیل پر پابندی:آٹا، چوکر، میدہ و دیگر پراڈکٹس لائی لیجائی جا سکتی ہیں:سینئر وزیرپنجاب

 پنجاب گندم کٹائی میں 22دن آگے ہے، فصل اچھی ہے،کسی بحران کا خدشہ نہیں:عبدالعلیم خان

 بزنس کمیونٹی خوراک کے شعبے میں آگے آئے، حکومت سپورٹ کریگی:چیمبر آف کامرس میں گفتگو

سینئر وزیر پنجاب عبدالعلیم خان نے کہا ہے کہ امسال پنجاب گندم کی کٹائی میں 22دن آگے ہے،صوبے میں گندم کٹائی کا آغاز جنوبی پنجاب سے جبکہ اختتام گوجرانوالہ میں ہوتا ہے۔انہوں نے بتایا کہ گزشتہ سال گندم کٹائی2مئی کو جبکہ اس مرتبہ 10اپریل سے شروع ہے، خراب موسم کے باوجودفصل بہت اچھی ہے اور انشاء اللہ کسی قسم کے بحران کا خدشہ نہیں۔ سینئر وزیر عبدالعلیم خان نے مزید کہا کہ گندم صوبے سے باہر جانے پر پابندی ہے البتہ آٹا،چوکر،میدہ او ر دیگر مصنوعات پرمٹ کے ساتھ پشاوراور سندھ تک جا رہی ہیں۔اسی طرح واضح ہدایات دی جا چکی ہیں کہ پنجاب بھر میں گندم کی بین الاضلاعی ترسیل پر کوئی پابندی نہیں لہذا مل مالکا ن کو غیر ضروری طور پر تنگ نہیں کیا جانا چاہیے۔اسی طرح پرمٹ کے ساتھ بین الصوبائی گندم بھی لے جائی جا سکتی ہے۔

ان خیالات کا اظہار انہوں نے چیمبر آف کامرس رحیم یار خان سے مشترکہ اجلاس میں گفتگو کرتے ہوئے کیا جہاں اراکین پنجاب اسمبلی چوہدری آصف مجید،میاں محمد شفیق اور میاں محمد شفیع بھی موجود تھے۔عبدالعلیم خان نے بزنس کمیونٹی سے اپیل کی کہ وہ خوراک کے شعبے آگے آئیں اور دنیا بھر میں پائے جانے والے جدید رحجانات کو پاکستان بالخصوص پنجاب میں متعارف کروائی، حکومت اُن کی ہر ممکن سپورٹ کرے گی۔سینئر وزیر نے کہا کہ زرعی صوبہ ہونے کے ناطے پنجاب کو خوراک کے شعبے میں خود کفیل دیکھنا ہر پاکستانی کی دیرینہ خواہش ہے۔انہوں نے کہا کہ ہمیں ذخیرہ اندوزی اور گراں فروشی جیسی حرکات سے نکل کر مثبت کاروباری سرگرمیوں کو فروغ دینا چاہیے تاکہ عام شہری کو کھانے پینے کی معیاری اشیاء وافر مقدار میں میسر ہو سکیں۔ سینئر ووزیر خوراک پنجاب عبدالعلیم خان نے رحیم یار خان چیمبر آف کامرس کی جانب سے پیش کردہ مسائل بالخصوص فلو ر ملز کی مشکلات دور کرنے کی یقین دہانی کروائی اور فلور ملزایسوسی ایشن پنجاب کے صدر عبدالرؤف مختار کو یقین دلایا کہ حکومت اس امر کو یقینی بنائے گی کہ فلور ملز کو غیر ضروری طور پر ضلعی انتظامیہ یا دیگر ادارے تنگ نہ کریں۔انہوں نے کہا کہ آٹا بنانا او ر اسے مارکیٹ میں فراہم کرنا فلور ملزکی بنیادی ذمہ داری ہے جس کے لئے انہیں ہر ممکن تعاون فراہم کیا جائے گا۔