سینئر وزیر پنجاب عبدالعلیم خان سے پاکستان کسان اتحاد کے مرکز ی صد ر خالد محمود کھوکھر کی ملاقات

محکمہ خوراک کاشتکاروں سے خریداری مہم میں گندم کا پورا وزن لے، سینئر وزیر عبدالعلیم خان کی ہدایت    چھوٹے کاشتکاروں سے زیادتی نہیں ہونی چاہیے،بہتر پیداوار کے لئے جدید ٹیکنالوجی نا گزیر ہے

 سینئر وزیر پنجاب عبدالعلیم خان سے پاکستان کسان اتحاد کے مرکز ی صد ر خالد محمود کھوکھر کی ملاقات

سینئر و وزیر خوراک پنجاب عبدالعلیم خان نے کہا ہے کہ گندم خریداری مہم میں بالخصوص چھوٹے کاشتکاروں سے زیادتی نہیں ہونی چاہیے، محکمہ اس امر کو یقینی بنائے کہ گندم خریدتے ہوئے وزن میں فالتو اضافہ نہ کیا جائے اور جتنی گندم ہو اُتنی ہی اُن کو ادائیگی ہونی چاہیے۔ اس امر کا اظہار انہوں نے آج یہاں پاکستان کسان اتحاد کے مرکزی صدر خالد محمود کھوکھر سے اپنے دفتر 90شاہرائے قائد اعظم پر ہونے والی ملاقات میں گفتگو کرتے ہوئے کیا۔عبدالعلیم خان کا کہنا تھا کہ بہتر پیداوار کے لئے زراعت کے شعبے میں جدید ٹیکنالوجی کا استعمال نا گزیر ہے۔انہوں نے کہا کہ بڑے کاشتکاروں کو خوراک کے شعبے میں بہتری کے لئے حکومت کا ساتھ دینے کے لئے آگے آنا چاہیے۔سینئر وزیر نے کہا کہ اس سال کسانوں کو حکومت نے کھلے بندوں باردانہ فراہم کیا ہے جس سے گندم کی خریداری بہتر ہو گی اور مڈل مین کا کردار کم سے کم ہو جائے گا۔ عبدالعلیم خان نے واضح کیا کہ وہ خوراک کے شعبے میں وزیر اعظم عمران خان کے ویژن کے مطابق تبدیلیاں لائیں گے اور چھوٹے کاشتکاروں کی استعداد کار بڑھانے کے لئے جس قدر ہو سکا اپنا کردار ضرور ادا کریں گے۔سینئر وزیر نے کسان اتحاد کے پلیٹ فارم سے کاشتکاروں کی فلاح و بہبود کے لئے ہونے والی سرگرمیوں کو سراہا اور انہیں اپنے ہر ممکن تعاون کا یقین دلایا۔

اپنی گفتگو میں پاکستان کسان اتحاد کے مرکزی صدر خالد محمود کھوکھر نے سینئر و وزیر خوراک پنجاب عبدالعلیم خان کو عہدہ سنبھالنے پر مبارکباد دی اور انہیں اپنے او ر اپنی ایسوسی ایشن کی طرف سے ہر ممکن تعاون کی یقین دہانی کرائی۔خالد محمود کھوکھر نے پنجاب حکومت کی گندم خریداری کے لئے اوپن پالیسی کو سراہتے ہوئے کہا کہ باردانے میں رکاوٹیں ختم کرنے سے عام کسان کی حوصلہ افزائی ہے۔انہوں نے سینئر وزیر عبدالعلیم خان کو دورہ ملتان کی دعوت بھی دی جس میں ایسوسی ایشن اُن کے لئے استقبالیے کا اہتمام کرے گی.