رانا ثناء اللہ سے کسی قسم کی بات چیت نہیں ہوئی،امید ہے انہوں نے بھی ایسا بیان نہیں دیا ہوگا

پی ٹی آئی کے مرکزی رہنما عبدالعلیم خان کی طرف سے رانا ثنا ء اللہ سے ٹیلی فونک رابطے کی تردید

 تحریک انصاف کا حصہ تھا،ہوں اور ہمیشہ عمران خان کے ساتھ رہوں گا:عبدالعلیم خان

 رانا ثناء اللہ سے کسی قسم کی بات چیت نہیں ہوئی،امید ہے انہوں نے بھی ایسا بیان نہیں دیا ہوگا

پاکستان تحریک انصاف کے مرکزی رہنما عبدالعلیم خان نے میڈیا میں آنے والی اس خبر کی سختی سے تردید کی ہے کہ اُن کا مسلم لیگ ن پنجاب کے صدر راناثنا ء اللہ سے ٹیلی فونک رابطہ ہوا ہے۔اپنی وضاحت میں عبدالعلیم خان کا کہنا تھا کہ اُن کی رانا ثنا ء اللہ سے کسی قسم کی کوئی بات چیت نہیں ہوئی اور اس سلسلے میں شائع ہونے والی خبر مکمل طور پر من گھڑت ہے۔انہوں نے یقین ظاہر کیا کہ رانا ثناء اللہ نے بھی اس طرح کا کوئی بیان نہیں دیا ہوگا۔عبدالعلیم خان نے وضاحت کرتے ہوئے مزید کہا کہ وہ تحریک انصاف کا حصہ تھے،ہیں اور انشاء اللہ ہمیشہ رہیں گے۔انہوں نے ہر مشکل وقت میں عمران خان کا ساتھ دیا اور آئندہ بھی دیتے رہیں گے جہاں تک انہیں کسی قسم کی ذمہ داری دیے جانے کا تعلق ہے اس کا فیصلہ بھی وزیر اعظم عمران خان نے کرنا ہے انہیں جب جہاں ضرورت محسوس ہوئی میں حاضر ہوں۔عبدالعلیم خان نے کہا کہ انہوں نے2011میں ملک گیر تبدیلی کے لئے تحریک انصاف میں شمولیت اختیار کی تھی اور وہ آج بھی پورے یقین کے ساتھ یہ سمجھتے ہیں کہ وہ تبدیلی صرف اور صرف عمران خان ہی لا سکتے ہیں اُن کی نیت پر کوئی شک نہیں کیا جا سکتا۔عبدالعلیم خان نے واضح کیا کہ اس طرح کی خبروں کے پیچھے بعض لوگوں کے مخصوص عزائم ہوتے ہیں جن کے بارے میں کچھ نہیں کہا جا سکتا.